Fin da viaxe!

 Hoxe tócame a min subir a entrega final deste curso que foi, para nós, venturoso.

Comezamos con moitos interrogantes e dúbidas. Eramos un equipo novo e, pese a confiar na eficacia do alumnado colaborador da biblio,  do Proxecto de 3º de ESO BiblioActiva e do equipo de radio guiado por  Belén Riádigos, RadioActiva, había moita incertidume. Mais tamén gañas. 

Certo é que todo se pode mellorar e tomamos nota dalgúns aspectos que nos fostes transmitindo, mais no EDB estamos abondo satisfeitas co labor realizado. Un equipo que, de momento continúa, aínda que se ventan cambios cara a setembro.

Como antes dixen, quen se viña ocupando das entrads do blog, está por fin de vacacións e correspóndelles xa un merecido descanso. Con todo, queremos dar testemuño da entrega deste equipo de BiblioActiva, do mesmo xeito que viñemos dando conta doutras actividades e participacións ao longo do curso.

E é que tivemos como traca final, para despedir o curso dende a biblio, a posta en escena do proxecto Donas de si  que consistiu nun teatro de sombras  no que colaborou o alumnado de 1º ESO  de Plástica, na elaboración de siluetas; o alumnado de 2º de ESO de Tecnoloxía, na construción da estrutura (pantalla); e do alumnado de BiblioActiva na dramatización.

É a verdade é que o iniciamos con entusiasmo, transitamos pola vertixe para acabar rendéndonos ante o saber facer do noso alumnado. 

1. Preparándonos e organizando o proceso

 

 

2. Unha vez montada a peza o alumnado organizouse para facer o derradeiro ensaio xeral

3.Estrea entre bambalinas...

 

4. A representación xa co público diante.

 

5. Saúdos de todo o alumnado que participou (actores, voces, dirección e equipa de son)

 

6. Satisfacción polo traballo feito.

As artes escénicas chegaron para quedar. O vindeiro ano máis !!

 

GALA DOS PREMIOS JOSÉ HERMIDA

O pasado venres, o alumnado pertencente ao club de radio asistiu á segunda edición da gala de Premios Jose Hermida, organizada pola Cadena SER, en Pontevedra. Quedamos entre os vinte finalistas, polo noso programa relacionado coa IA, Conexión futuro. 

A gala estivo chea de sorpresas: gozamos co grupo De vacas, que fai versións de temas comerciais cun toque humorístico en galego; escoitamos o sorprendente Coro A Xunqueira, do IES Xunqueira I, e tivemos a sorte de presenciar un espectáculo de maxia protagonizado por Pedro Volta, un famoso ilusionista.

 

Estamos moi contentos e contentas por esta oportunidade e, dende esta entrada, queremos agradecer a Belén por axudarnos con este programa e facer posíbel acadar novas metas xuntos.

 

 

CELEBRANDO O DÍA DO LIBRO

Certo é que pasou tempo abondo dende o Día do Libro, mais coas vacacións de Pascua polo medio quedáranos esta entrada  sen incluír, e non era cousa de deixala pasar.

Para conmemorar ese día, a Biblioteca organizou diferentes actividades que contaron coa participación do alumnado do centro.

Cunha presentación preparada por Beatriz Salvo, a profe de EPeV, durante os recreos activos da semana do 20 a 24 de abril dedicámonos a dar nova vida a algúns dos nosos fondos expurgados.

Houbo diversas intervencións, mais non todas concluídas. Esperemos que as súas “autoras” veñan rematalas para que pasen á categoría de Libros intervidos, como estes que aquí aparecen:

Tamén se organizou unha Caza do tesouro para premiar o bo uso da biblioteca e repasar a formación de usuarios. Establecéronse diversas quendas e equipos,  pretendendo que  fosen equilibrados, e houbo premios para os que “mellor se manexaron”.

Ha, ha! Estabamos tan metidas na actividade que esquecemos as fotos!

Tras o éxito da convocatoria do ano pasado,  non podía faltar a convocatoria do concurso Un libro é unha porta que se abre de simulación das portas das aulas coma cadansúa tapa dun libro real ou evocado.

Dunha forma ou doutra, houbo propostas de todos os cursos e grupos. O xurado coas rúbricas nas mans foi percorrendo o centro na procura da portada que chamase a súa atención...

E as gañadoras resultaron ser...

E velaquí a celebración 

                                        

UN ENCONTRO INESQUECIBLE CON ROCÍO LEIRA

O pasado 22 de abril a nosa biblioteca encheuse de emoción, curiosidade e palabras grazas á visita de Rocío Leira, autora de Tres catorce dezaseis, a obra que compartimos no club de lectura durante o segundo trimestre.

Despois de convivir coas páxinas desta historia que mestura misterio, suspense e matemáticas, poder coñecer a persoa que lle deu vida foi un auténtico privilexio. Rocío achegounos ao proceso de creación da novela, ás emocións e experiencias que a inspiraron e fíxonos sentir, unha vez máis, a maxia da lectura.

Foi un encontro moi especial no que puidemos compartir impresións, emocións, preguntas e reflexións sobre unha obra que nos gustou moito.  A cercanía da autora, a súa xenerosidade e a maneira de responder cada unha das nosas preguntas (que foron moitas!) e ata dedicar cada un dos nosos exemplares fixeron que a mañá resultase inesquecible.

Grazas, Rocío, por regalarnos o teu tempo, as túas palabras e a túa mirada sobre a literatura en galego. Levaremos connosco este encontro como un deses momentos que fan da biblioteca un lugar cheo de vida.

 PARABÉNS ÁS REPORTEIRAS DE 3º ESO

O IES de Meaño acaba de ser galardoado no concurso de Pódcasts-Radio na Biblio. O traballo gañador, titulado O pracer de tecer vida, foi creado polas reporteiras de 3º de ESO e ofrece un percorrido ameno pola biografía de Begoña Caamaño, homenaxeada nas Letras Galegas 2026.

"A AUTORIZACIÓN DO CENTRO DA PALABRA"

    O pasado 9 de abril, veunos visitar Sofía Muñiz Somoza, a creadora do poemario A autorización do centro da palabra. Sofía o ano pasado traballou nestre centro como profesora de lingua galega e literatura. Para o seu alumnado foi moi emotivo volvela ver, nesta ocasión noutro contexto, acadando un dos seus obxectivos. A finalidade da charla era coñecer de primeira man os seus poemas. 

    Chegando ao final da charla, Sofía recitounos un texto que creou para nós, con versos de diferentes poemas do seu poemario. Finalmente, fixemos unha pequena rolda de preguntas e Sofía animounos a escribir todo o que nace no noso pensamento.  

Achegamos imaxes da actividade:

OS MÓNOLOGOS VIAXAN Á PRIMARIA

O pasado venres 27 de marzo, tivemos a oportunidade de compartir os monólogos que fixemos na materia de Lingua Galega de 3º co alumnado de 5º e 6º do CEIP Coirón Dena. Polo que nos dixeron, quedaron moi contentos co noso traballo e grazas a eles soubemos superar un pouco os nervios á hora de falar en público.

Achegámosvos imaxes da actividade:

 

O poder das nosas voces

O pasado luns 23 de marzo, visitounos o actor Dani Blanco e mostrounos o poder da nosa voz e todas as posibilidades que temos con ela. 

Con el o alumnado de terceiro fixemos unhas actividades, moi divertidas e dadácticas, coas que puidemos comprobar a importancia da nosa voz ao transmitir as mensaxes. Algunhas destas actividades consisitron en quentar a voz, aprender a cambiar a entoación segundo o noso obxectivo comunicativo, xogar a inventar historias, crear unha historia con dez palabras moi diferentes elixidas por outra persoa, poñérmonos na pel de obxectos e animais tendo en conta unha situación inventada por outra persoa...

 

Despois destas actividades, ao final do día, tivemos a sorte de presenciar un agradábel concerto cunha historia moi divertida. Mentres Dani facía de narrador da mesma, o seu compañeiro, Ze Pumar, acompañábao co acordeón e coa voz, facendo que a historia fose máis doada de entender e estivese mellor ambientada.

Xuntos fan un gran equipo e grazas a eles pasamos unha hora estupenda.

DÍA INTERNACIONAL DA MULLER E A NENA NA CIENCIA

O 11 de febreiro, a ONU proponnos conmemorar o Día Internacional da Muller e a Nena

na Ciencia, un día moi importante para facer soar as voces de todas aquelas mulleres que

quedaron a varrer na casa, mentres tiñan milleiros de hipóteses no seu maxín.

Durante toda a vida, as mulleres fomos consideradas farrapos, unha planta máis da casa

que estaba a limpar o aire. Porén, non era a incapacidade a que nos minguaba, senón unha

néboa “máis forte” e “obrigatoriamente” de pelo curto que tapaba o Sol e impedía que

medraramos. Porén, Sofía Sorbet Santiago, desde Marín e non desde Compostela, foi

quen de abrirse un camiño con lápis e libros.

Desde o IES de Meaño, a proposta da biblioteca, o alumnado de 3ºESO gozou dunha

conversa con ela para conmemorar esta data e escoitar a súa historia. Falounos dos seus

estudos, dos lugares do mundo nos que viviu (actualmente está no Reino Unido), das súas

experiencias... Ademais, compartiu algo que un mestre lle dixo no bacharelato: “As

mulleres non son listas, son traballadoras”. Estas palabras provocaron unha loita interna

en Sofía, quen estivo un ano escolar enteiro demostrando o contrario. Son estes ecos os

que con estas charlas estamos a intentar erradicar, porque aínda fan demasiado ruído.

Despois de coñecer un pouco da historia de Sofía, puidemos preguntarlle todas as nosas

dúbidas.

Persoalmente, unha muller galega relatando todo o que logrou foi moito máis que un

conto de boas noites. Foi forza e un anaquiño de claridade co potencial dun motor que

ilustra como os soños poden facerse realidade.

Ecos poéticos arredor da biblioteca

O xoves pasado, arredor da biblioteca, comezaron a oírse uns murmurios nas proximidades da biblioteca. Saían de alí mesmo, aínda que non unicamente.

Polos corredores da planta baixa, escoitábanse voces, mais non soaban coma sempre no cambio de clase ou no recreo. Eran voces menos intensas e de varias persoas qeu falaban con titmos moi diferentes.

Mais non foi unicamente na biblioteca, nin nos corredores... 

                Aquelas voces chegaran ao patio de abaixo tamén.

    Por incríbel que pareza estendéronse por todos os recunchos da planta baixa

A verdade é que por momentos chegaron a sentirse acompasadas. 

Era unha actividade de Lingua e literatura castelá de  2º de ESO.  A rapazada dos dous grupos de 2º  coa profesora estaban  preparando a lectura duns poemas dos que teremos novas proximamente.