UN ENCONTRO INESQUECIBLE CON ROCÍO LEIRA

O pasado 22 de abril a nosa biblioteca encheuse de emoción, curiosidade e palabras grazas á visita de Rocío Leira, autora de Tres catorce dezaseis, a obra que compartimos no club de lectura durante o segundo trimestre.

Despois de convivir coas páxinas desta historia que mestura misterio, suspense e matemáticas, poder coñecer a persoa que lle deu vida foi un auténtico privilexio. Rocío achegounos ao proceso de creación da novela, ás emocións e experiencias que a inspiraron e fíxonos sentir, unha vez máis, a maxia da lectura.

Foi un encontro moi especial no que puidemos compartir impresións, emocións, preguntas e reflexións sobre unha obra que nos gustou moito.  A cercanía da autora, a súa xenerosidade e a maneira de responder cada unha das nosas preguntas (que foron moitas!) e ata dedicar cada un dos nosos exemplares fixeron que a mañá resultase inesquecible.

Grazas, Rocío, por regalarnos o teu tempo, as túas palabras e a túa mirada sobre a literatura en galego. Levaremos connosco este encontro como un deses momentos que fan da biblioteca un lugar cheo de vida.

 PARABÉNS ÁS REPORTEIRAS DE 3º ESO

O IES de Meaño acaba de ser galardoado no concurso de Pódcasts-Radio na Biblio. O traballo gañador, titulado O pracer de tecer vida, foi creado polas reporteiras de 3º de ESO e ofrece un percorrido ameno pola biografía de Begoña Caamaño, homenaxeada nas Letras Galegas 2026.

"A AUTORIZACIÓN DO CENTRO DA PALABRA"

    O pasado 9 de abril, veunos visitar Sofía Muñiz Somoza, a creadora do poemario A autorización do centro da palabra. Sofía o ano pasado traballou nestre centro como profesora de lingua galega e literatura. Para o seu alumnado foi moi emotivo volvela ver, nesta ocasión noutro contexto, acadando un dos seus obxectivos. A finalidade da charla era coñecer de primeira man os seus poemas. 

    Chegando ao final da charla, Sofía recitounos un texto que creou para nós, con versos de diferentes poemas do seu poemario. Finalmente, fixemos unha pequena rolda de preguntas e Sofía animounos a escribir todo o que nace no noso pensamento.  

Achegamos imaxes da actividade:

OS MÓNOLOGOS VIAXAN Á PRIMARIA

O pasado venres 27 de marzo, tivemos a oportunidade de compartir os monólogos que fixemos na materia de Lingua Galega de 3º co alumnado de 5º e 6º do CEIP Coirón Dena. Polo que nos dixeron, quedaron moi contentos co noso traballo e grazas a eles soubemos superar un pouco os nervios á hora de falar en público.

Achegámosvos imaxes da actividade:

 

O poder das nosas voces

O pasado luns 23 de marzo, visitounos o actor Dani Blanco e mostrounos o poder da nosa voz e todas as posibilidades que temos con ela. 

Con el o alumnado de terceiro fixemos unhas actividades, moi divertidas e dadácticas, coas que puidemos comprobar a importancia da nosa voz ao transmitir as mensaxes. Algunhas destas actividades consisitron en quentar a voz, aprender a cambiar a entoación segundo o noso obxectivo comunicativo, xogar a inventar historias, crear unha historia con dez palabras moi diferentes elixidas por outra persoa, poñérmonos na pel de obxectos e animais tendo en conta unha situación inventada por outra persoa...

 

Despois destas actividades, ao final do día, tivemos a sorte de presenciar un agradábel concerto cunha historia moi divertida. Mentres Dani facía de narrador da mesma, o seu compañeiro, Ze Pumar, acompañábao co acordeón e coa voz, facendo que a historia fose máis doada de entender e estivese mellor ambientada.

Xuntos fan un gran equipo e grazas a eles pasamos unha hora estupenda.

DÍA INTERNACIONAL DA MULLER E A NENA NA CIENCIA

O 11 de febreiro, a ONU proponnos conmemorar o Día Internacional da Muller e a Nena

na Ciencia, un día moi importante para facer soar as voces de todas aquelas mulleres que

quedaron a varrer na casa, mentres tiñan milleiros de hipóteses no seu maxín.

Durante toda a vida, as mulleres fomos consideradas farrapos, unha planta máis da casa

que estaba a limpar o aire. Porén, non era a incapacidade a que nos minguaba, senón unha

néboa “máis forte” e “obrigatoriamente” de pelo curto que tapaba o Sol e impedía que

medraramos. Porén, Sofía Sorbet Santiago, desde Marín e non desde Compostela, foi

quen de abrirse un camiño con lápis e libros.

Desde o IES de Meaño, a proposta da biblioteca, o alumnado de 3ºESO gozou dunha

conversa con ela para conmemorar esta data e escoitar a súa historia. Falounos dos seus

estudos, dos lugares do mundo nos que viviu (actualmente está no Reino Unido), das súas

experiencias... Ademais, compartiu algo que un mestre lle dixo no bacharelato: “As

mulleres non son listas, son traballadoras”. Estas palabras provocaron unha loita interna

en Sofía, quen estivo un ano escolar enteiro demostrando o contrario. Son estes ecos os

que con estas charlas estamos a intentar erradicar, porque aínda fan demasiado ruído.

Despois de coñecer un pouco da historia de Sofía, puidemos preguntarlle todas as nosas

dúbidas.

Persoalmente, unha muller galega relatando todo o que logrou foi moito máis que un

conto de boas noites. Foi forza e un anaquiño de claridade co potencial dun motor que

ilustra como os soños poden facerse realidade.

Ecos poéticos arredor da biblioteca

O xoves pasado, arredor da biblioteca, comezaron a oírse uns murmurios nas proximidades da biblioteca. Saían de alí mesmo, aínda que non unicamente.

Polos corredores da planta baixa, escoitábanse voces, mais non soaban coma sempre no cambio de clase ou no recreo. Eran voces menos intensas e de varias persoas qeu falaban con titmos moi diferentes.

Mais non foi unicamente na biblioteca, nin nos corredores... 

                Aquelas voces chegaran ao patio de abaixo tamén.

    Por incríbel que pareza estendéronse por todos os recunchos da planta baixa

A verdade é que por momentos chegaron a sentirse acompasadas. 

Era unha actividade de Lingua e literatura castelá de  2º de ESO.  A rapazada dos dous grupos de 2º  coa profesora estaban  preparando a lectura duns poemas dos que teremos novas proximamente.

Mans á obra!

 

Xa hai uns días  a biblioteca do centro encheuse de actividade e viuse ateigada de fermosos carteis, postais e tarxetas. 

Tivemos ocasión de participar nun obradoiro de impresión artesanal da man de Alouette machine.

Jean Baptiste e Cristina mostráronnos como xogar cos elementos gráficos e o seu significado, ao tempo que nos deron a coñecer o xeito en que se elaboraban antigamente os libros, carteis, postais ou tarxetas.

Todo o alumnado do centro pasou pola biblioteca para colaborar, e tivo estes días unha caloriña que normalmente non ten.

Comezamos diferenciando tinta de pintura, escollemos entre as fermosas letras de madeira as que precisabamos e dispuxémolas na prancha. 

Ollo co efecto espello!

!

Queriamos visibilizar un tema que estivemos traballando durante algún tempo para conmemorar o Día dos Dereitos Humanos e o Día Internacional da Paz.

Finalmente, pasamos o rolo varias veces e conseguimos unha boa produción. 

Velaquí algunhas das nosas creacións 

Quedaron pendurados dun tendal na biblioteca, como a roupa acabada de lavar, agardando secar ben.

En canto sequen ben, cousa difícil con tanta humidade,  colocarémolos nun lugar destacado do centro.

Bo Nadal!

 Celebración do Nadal

    O pasado 19 de decembro despedímonos do 1º trimestre cunha celebración organizada polo alumnado de 4ºESO.  Este día estivo cheo de sorpresas.

    En primeiro lugar, pasamos un pouquiño de medo no túnel do terror que, aínda que era unha actividade organizada para a celebración do Samaín, resultou imposíbel gozar del por uns imprevistos técnicos; para visibilizar o traballo realizado nel decidiuse facer nesta data. Pasamos un Nadal cheo de sustos!

    Máis tarde fixemos unha xincana guiada polos nosos compañeiros e compañeiras de 4º, que nos daban pistas para chegar a lugares onde nos agardaban para facer diferentes actividades. As actividades eran moi variadas e divertidas, como xogos coa pelota, mímica, preguntas sobre o Nadal... Todo o centro competía por facelo no menor tempo posíbel e o grupo gañador foi premiado cun agasallo.

   Pouco despois fixemos un Kahoot relacionado coa festividade e nel participaba cada clase como grupo, os gañadores tamén recibiron unha sorpresa. Xusto despois o alumnado de 4º tiña organizado un concurso musical: por parellas, concursábase para escoitar unha canción: o primeiro en coller o borrador tiña a quenda de palabra e podía dicir o título da canción, o nome do cantante ou continuar cantando. O gañador de cada clase competiu nunha final organizada no pavillón.

   A seguir, fixemos divertidas actividades no pavillón. Para comezar, tivo lugar a actividade do concurso de talentos, nel participou alumnado de diversas idades. Actuaban diante de todo o instituto e había un xurado formado por persoal docente, non docente  e alumnado que valoraba cada talento.  O concurso estivo cheo de actuacións diversas, como rapeiros, cómicos... As gañadoras foron un grupo de nenas de 3º chamadas "Olor a miel" que nos asombraron coa súa  coreografía de acrosport. 

     No pavillón tamén se entregaron os premios do concurso de sobremesas, nel participaron moitos nenos e nenas que fixeron sobremesas de Nadal. Varios xuíces degustaron cada sobremesa e elixiron como gañadora unha alumna de 1°.

     Finalmente, houbo unha emotiva despedida de dous profesores moi representativos do centro. 

       Despedímonos de Tana, que se xubila despois de pasar toda a súa vida laboral no IES de Meaño. Primeiro, Nicolás Buceta leu un pequeno e cariñoso discurso e logo todo o alumnado de 1° saíu a cantar un tema chamado “We’re going to be friends”, unha canción dos “The White Stripes” que cantaban con ela na aula.

 

  Tamén houbo unhas bonitas e alentadoras palabras para despedir a Roberto, que se vai en comisión de servizos a América Latina.

     Desexámoslles que lles vaia moi ben nesa nova etapa que inician e que saiban que o IES de Meaño será a súa casa, mentres haxa nel alguén que os lembre.

       E como coa despedida de Tana e Roberto queda esta entrada un pouco triste, lembrámosvos que iniciamos as tan necesitadas vacacións. Así que: 

Moi bo Nadal!

Celebración do 25N

    25N: Voces que non calan!

    Bo día! Estades preparados para un dos días máis importantes de todo o ano? Nós estamos máis que listas para afrontar este día cheo de expectativas. O 25N é unha data para denunciar todas aquelas violencias recibidas polas mulleres e os seus fillos. Este día foi escollido para lembrar as irmás Mirabal, que foron brutalmente asasinadas na República Democrática en 1960 por ser mulleres e activistas. Son coñecidas como “As bolboretas”.

    En primeiro lugar, todas as compañeiras de BiblioActiva estivemos traballando nun programa de radio para recordar a importancia de facernos fortes coa nosa voz e non quedar caladas ante as inxustizas. Este programa foi escoitado por todo o centro no pavillón. Alí as nosas compañeiras de 4ºESO fixeron unha exposición sobre varias mulleres que sufriron violencia de xénero. 

    Tamén fixemos actividades na clase, como un cuestionario relacionado coa celebración do día e outras dúas actividades feitas por Lourdes Atencia Ruiz sobre a prostitución, como unha forma máis de violencia sobre as mulleres que tendemos a normalizar. Achegamos as dúas últimas para todo aquel que teña interese en facelas:

Actividade 1       Actividade 2

    Dende a biblioteca tamén se colaborou para facer este día moito máis importante, recompilando libros que xiran ao redor do tema, así todos podemos aprender máis cousas e estar alerta.