O alumnado de 2º da ESO traballou en Lingua Galega o haiku. Biblioteca animounos a elaborar unha serie deles motivados pola guerra en Ucraína. Deste xeito, a rapazada achegouse á sociedade e fíxose partícipe da dor e o sufrimento do pobo. Vaia, que a guerra entrou tamén nas aulas, e o alumnado amosou unha sensibilidade incrible. Finalmente expuxéronse na entrada do centro.
Na materia de Lingua Galega estiveron traballando a poesía. Cando remataron a lectura do libro Cidades de Fran Alonso, crearon poemas obxecto. Expuxéronos no corredor e atraeron miradas curiosas. Unha boa forma de amosar a súa particular visión plástica da palabra escrita. Velaí algúns exemplos:
A amteria de Educación Física fixo co seu alumnado unha recollida de deportistas do concello de Meaño, e, entre eles e elas, hai varias alumnas e ex alumnos do centro. Hai moita variedade de deportes. Con todo o seleccionado, elaboraron un cartel que foi un dos máis vistos deste curso!
Un ano máis chega o 8 de marzo e o IES de Meaño desprega a súa pancarta para berralo ben alto. Na materia de Igualdade, o alumnado de 2º da ESO traballou arreo para conmemoralo e lembrar a todas aquelas mulleres que nos deixaron este ano por mor da violencia de xénero. Para iso ofreceron a súa particular visión desta violencia a través da metáfora visual. Cada unha destas caixas, que se colgaron na biblioteca, serviu para amosar a súa particular visión deste problema social.
